HAL QALBI IYO HAL QOF.💉🩸❤️

 HAL QALBI IYO HAL QOF.💉🩸❤️

Maalin ka duwan todobada maalmood, ee todobaadka ayaad noloshayda kusoo biirtay. Maalin aan jeclaan lahaa in ay aniga khaas ii noqoto, oo aan la ila waadagin. Sida aan ku helay xog sabti ayaan dunidan kowsaday, adna isla sabti ayaad noloshayda kusoo biirtay. Sidaa darteed sabtidu waa maalintayda.

Xidhiidh aan ku badhaadhaay ayaa dhexdeena ka unkamay. Waxa aan kaa bartay waxbadan oo aanan la'aanta barteen. Wanaag, ixtiraam, iyo jacayl intaba agtaada ayaa ay yalaan.

Farxaddaydu adiga ayay gacantaada ku jirtaa. Murug marka aan dareemo dhinacaaga ayaan imaad, si aan u nafiso. Farxad marka aan helana agtaada kama nagaankaro. 

Daqiiqad walba oo aan kula qaadata waa ay iiga duwantahay  nolol maalmeedkayga intiisa kale.

Aniga ayaa la iguu kaa talo galay. May waa la iskugu keen talo galay. Macquul ma'aha in aan kala maarano inagu.  Si khaas ayaan kuugu hambalyaynayaa. Waad mutaysatay in aan kuu hambalyeeyo, maadama oo aad kasoo baxday wajibaadkii jacayl ee dhexdeena yaalay.  

Dadka intooda badan waxa ay i waydiiyaan waxa aan sidan kuugu jeclaaday, lakiin ma oga in aad u qalanto jacayl kan ka badan. Hadii ay jirto sidan si kabadan oo qof loo jeclaado, waan kuu jeclaan lahaa. Waad u qalantaa in lagu jeclaado. Mararka qaar waxa aan u maleeyaa in aad qayb iga mid ah tahay. Waabadtahay, oo waxa aad tahay qayb iga mid ah oo iga maqnayd. Waan ku helay lakiin wali kuma hantiyin. Umalayn maayo in Alle qof kale calafkiisa kaa dhigi doono. Waan kugu ducaystaa. 

Ma tihid qofkii kowaad ee uu xidhiidhna dhexmaro, lakiin waxa aad tahay qofkii qudha ee aan u jeclaaday sidan xadka baxa ah. Waxa aad tahay qofka kaliya ee i dareensiiyay in ay noloshu tahay jacayl, jacaylkuna yahay nolol.  Xiisahaagu maaha mid qalbigagayga ka suula. Waan kuu xiisay adiga oo ila jooga, wanaan ku xiisaa adiga oo iga maqan. 

Hadal kasta oo aad i tidhaa micno khaas ah ayuu ii sameeyaa, Xataa haddii uu yahay mid aan macno lahayn, aniga ayaa u sameeya micnaha ugu fiican. Qof aan adiga ahayn la hadalkiisu wax muhiim uma arko. May iimaba aha  muhiim.  Waa sababta aan u yeeshay halhayska "Hal qof iyo hal qalbi" Nafsadayda, iyo niyadayda oo dhan kaligaa ayaan kugu marti-qaaday. Waan ku siiyay. Ilama aha adiga qof ku bartay in uu u baahan karo ruuxkale. Dadku marka ay isku cusub yihiin waxa ay muujiyaan intooda wanaagsan, lakiin adigu wajigaaga dhabta ah ayaad igula dhaqantay. In aan barto dabeecaddaada rasmiga ah, waxa ay ii fudaydisay in aan helo qofkan rabay, isla markaana aan ku jeclaado. 

Daqiiqado ayaan ku dhisaa nolol aad adigu gadhwadeen ka tahay, hadana waan dumiyaa marka aan agtayda kaa waayo. Dawaaf ayaan ku tagaa badwaynta jacaylka, biyaha ku jira ayaan soo kabbadaa, isla ilbidhiqsigaa ayaan kasoo laabtaa. Markale adiga ayaa uso dalxiis taga qalbigayga. Bustaannada caashaq ee aad qalbigaygan ka beeratay ayaad hadba dhinac u taxtaxaashtaa. Midhaha curdinka ah ee dhawaan inoo bixi doona ayaad xannaanaysaa. Roob aan u di'in hortaa ayaad ku waraabisaa. 

Guri aan innagu leenahay, oo aan joogno ayaan sawirtaa. Ubadka aan dhalnay ayaa aynu ciyaarsiinaa. Marba midkeen ayaa la caweeyaa, innaguna waan wada cawaynaa. Daruur caashaq ayaa dushayda ku hoorta. Durba doogga ayaa is qabta. Beertaan imika beeray, ayaa isla imika baxda. Midhaha aan kasoo guray ayaan wadajir u wadaagnaa.

Maalin ayay inoo rumoobi doontaa riyadeennu. Maalin ayaan noqon doonnaa lammaane ay ku daydaan dadka ii jecel oo idil. Maalinka ayaa ay farxi doonaan dhammaan dadka inala jira oo dhan. Waan ku jeclahay.

waxaad qotontaa wadnaha

Qudhaad ila qaybsataa

Halkayga qof ee isagu 

Halkii qalbi qaatayow 

Adaan kali kugu qancaa

Murugtaa adigaa qufula

Farxadaada qaybteeda 

Badan ayaad ii qaybisaa

Dharaaraha qaabka daran

Qalylkiyo murugta badan

Kashaad qosal siisay baa

Qudhayda ag joog ku tiri

Qabkiyo kibirkii badanaa

Quluubtii bari adkayd 

Qofkii  iga maydhayee

Qalbiga hantayee dagee

Xubiga qudhqudhsiiyayow

Qarniyo ila joog macaan 

Quruxda nolshenan wacan

Qaybaha kale ee ka maqan

Qalayf murugiyo xanuun

Ha quusan dhabar adayg

Anaa kugu qancsanoo

Dhibaatada kugu qawadin

Haduu qaadir yeelo oo

Qoraal waynana imaan 

Qudhaada ag joogi abid

Halkayga qofee isagu

Qulubtii wada dagow

Qudhiyo ruuxdayda iyo

Hankaa kugu qanacsane

Qosol oo ii farxsanow

Qalbiga ruuxisiyow

Qolkaad kasha sesatee

Adigu qaas yelataa

Qayrkaa kaa qaadi karin

Farxada qormadeediyow

Murugta marka uu qasdiyow

Midkii quwadeed lahow

Ha qasin jawiyada qurxoon

Haduu qalqalooc yimaad

Qabqabsi cadho iyo ismaag

Qofkaan iga quusanee

Qadhaadh samir ii dhamow

Nolasha quruxdeed lahow

W/Q: Fuad M. Muhumed 

Halkaa guji.

https://www.blogger.com/blog/posts/8031088701880422559